Tula Ng Pag-Ibig

Nais kong makabuo ng isang tula

Ngunit di alam kung paano ang simula
Di ko alam kung paanong ang mga letra
Ay lalaruin upang maging isang obra

Nais kong makabuo ng isang tula
Na ang kariktan nito’y di mawawala
Hindi tulad ng iyong mga pangako
Na halos ang kabuuan ay napako

Pagsusumikapan ko na makabuo
Gaya ng pagbuo sa durog kong puso
Lalapatan ng magandang simulain
Na parang yung “tayo” na naglaho lang din

Lalagyan ng magagandang salita
Tulad ng iyong sinabi sakin sinta
Idedetalye ang bawat pangyayari
Yaring tayo na di alam ang nangyari

Dito ilalahad sigaw ng damdamin
Na sayo’y di manlang maamin
Sa pamamagitan ng tula kong ito
Damhin mo itong aking pagsusumamo

Panghuli, matatapos sa isang wakas
Kung paanong ang pag-ibig mo’y nagwakas
Subalit ito’y pupunuin ng saya
Upang di matulad sa’ting nagdurusa